శ్రీశైలం: ప్రసిద్ధ పుణ్యక్షేత్రమైన శ్రీశైల శ్రీ మల్లికార్జున స్వామి అమ్మవార్ల దేవస్థానంలో సామాన్య భక్తుల సౌకర్యాన్ని ప్రాధాన్యతగా తీసుకుంటూ ప్రోటోకాల్ దర్శనాల్లో కీలక మార్పులు చేసినట్లు ఆలయ యాజమాన్యం వెల్లడించింది. క్షేత్రానికి వచ్చే సాధారణ భక్తుల రద్దీని దృష్టిలో ఉంచుకుని, వారి దర్శన వేళల్లో ఎలాంటి ఇబ్బందులు తలెత్తకుండా ఉండేందుకు ఈ నూతన నిర్ణయం తీసుకున్నట్లు తెలిపింది.
ఈ కొత్త నిబంధనల ప్రకారం వారంలో ప్రధానంగా రద్దీ ఉండే శని, ఆది మరియు సోమవారాల్లో ఉదయం, మధ్యాహ్న సమయాల్లో స్వామివారి స్పర్శ దర్శనాలను పూర్తిగా రద్దు చేశారు. ఈ మూడు రోజులలో కేవలం రాత్రి వేళల్లో మాత్రమే విఐపి మరియు ప్రోటోకాల్ స్పర్శ దర్శనాలకు అనుమతి ఇస్తారు. ఇక మిగిలిన రోజుల్లో (మంగళ, బుధ, గురు, శుక్రవారాల్లో) పూర్వం ఉన్నట్లుగానే రోజూ మూడు పూటలా యధావిధిగా స్పర్శ దర్శనాలు కొనసాగుతాయని దేవస్థానం స్పష్టం చేసింది.
అదేవిధంగా ప్రోటోకాల్ దర్శనాలు, బ్రేక్ దర్శనాల కోసం వచ్చే వివిధ రకాల సిఫార్సు లేఖలు, అధికారిక లెటర్ హెడ్లను దర్శన సమయానికి కనీసం రెండు రోజుల ముందే దేవస్థానానికి అందజేయాలని శ్రీశైలం ఆలయ కార్యనిర్వహణాధికారి (ఈవో) సూచించారు. ఆయా తేదీల్లో వచ్చే భక్తుల రద్దీని సమర్థవంతంగా నిర్వహించేందుకే ఈ నిబంధనలు విధిస్తున్నామని, విఐపిలు మరియు భక్తులు దేవస్థాన యాజమాన్యానికి సహకరించాలని కోరారు.