షాద్నగర్: షాద్నగర్ నియోజకవర్గ పరిధిలోని వివిధ ప్రాథమిక వ్యవసాయ సహకార పరపతి సంఘాల (పీఏసీఎస్–సింగిల్ విండో) నూతనంగా ఎంపికైన చైర్మన్లు, పాలకవర్గ సభ్యులకు షాద్నగర్ ఎమ్మెల్యే వీర్లపల్లి శంకర్ ప్రత్యేక శుభాకాంక్షలు తెలిపారు. రైతుల సంక్షేమమే ప్రధాన లక్ష్యంగా పనిచేస్తూ పీఏసీఎస్లను మరింత పారదర్శకంగా, సమర్థవంతంగా నిర్వహించాలని నూతన పాలకవర్గాలకు సూచించారు.
రైతాంగానికి ప్రభుత్వం ద్వారా అందే వివిధ రకాల పంట రుణాలు, సబ్సిడీ విత్తనాలు, ఎరువులు మరియు ఇతర వ్యవసాయ ఆధారిత సేవలు సకాలంలో అందేలా నూతన పాలకవర్గాలు ప్రత్యేక కృషి చేయాలని ఎమ్మెల్యే ఆకాంక్షించారు. క్షేత్రస్థాయిలో రైతులు ఎదుర్కొంటున్న సమస్యలను స్వయంగా గుర్తించి తక్షణమే పరిష్కరించడంలో చొరవ చూపాలని కోరారు.
అదేవిధంగా, కేశంపేట్ మాజీ జెడ్పీటీసీ తాండ్ర విశాల శ్రావణ్ రెడ్డి కూడా నూతన పీఏసీఎస్ చైర్మన్లు, పాలకవర్గ ప్రతినిధులకు అభినందనలు తెలిపారు. పీఏసీఎస్లు గ్రామీణ ప్రాంత రైతుల ఆర్థిక అభివృద్ధికి బలమైన మూలస్తంభాలని, ప్రభుత్వ సంక్షేమ పథకాల ఫలాలు ప్రతి చివరి రైతుకూ చేరువయ్యేలా సమన్వయంతో పనిచేయాలని సూచించారు. షాద్నగర్ నియోజకవర్గంలో వ్యవసాయ రంగాన్ని బలోపేతం చేసేందుకు సహకార వ్యవస్థను ఉపయోగిస్తూ, తమ పదవులకు వన్నెతెచ్చేలా పనిచేసి రైతుల విశ్వాసాన్ని నిలబెట్టుకోవాలని ఎమ్మెల్యే వీర్లపల్లి శంకర్, తాండ్ర విశాల శ్రావణ్ రెడ్డి పిలుపునిచ్చారు.