మహేశ్వరం: పోలీసు అమరవీరుల వారోత్సవాలు, పోలీస్ ఫ్లాగ్ డే వీక్ సందర్భాన్ని పురస్కరించుకుని మహేశ్వరం మండల కేంద్రంలోని ఓ ప్రైవేట్ కన్వెన్షన్ హాల్‌లో విద్యార్థులకు వినూత్న రీతిలో వ్యాసరచన పోటీలను నిర్వహించారు. డీజీపీ సీవీ ఆనంద్, ఫ్యూచర్ సిటీ కమిషనర్ తరుణ్ జోషిల సూచనల మేరకు, మహేశ్వరం ఫ్యూచర్ సిటీ డీసీపీ నారాయణరెడ్డి, ఏసీపీ జానకి రెడ్డిల మార్గదర్శకత్వంలో ఈ కార్యక్రమాన్ని చేపట్టినట్లు ఎస్‌హెచ్‌ఓ రాఘవేందర్ రెడ్డి తెలిపారు.
ఈ సందర్భంగా ఎస్‌హెచ్‌ఓ రాఘవేందర్ రెడ్డి మాట్లాడుతూ.. సైబర్ నేరాల నివారణ, మాదకద్రవ్యాల దుష్పరిణామాలు, సోషల్ మీడియా దుర్వినియోగం అరికట్టడం, మాదకద్రవ్య రహిత తెలంగాణ నిర్మాణంలో విద్యార్థుల కీలక పాత్ర వంటి సమకాలీన అంశాలపై ఈ పోటీలు నిర్వహించినట్లు వెల్లడించారు. ఈ కార్యక్రమంలో ప్రభుత్వ డిగ్రీ, జూనియర్ కళాశాలలు, పాలిటెక్నిక్ కళాశాల, మోడల్ స్కూల్‌తో పాటు శ్రీ చైతన్య, అక్షర విద్యాసంస్థలకు చెందిన 1,000 మందికి పైగా విద్యార్థులు ఎంతో ఉత్సాహంగా పాల్గొని తమ ఆలోచనలను వ్యాసాల రూపంలో పంచుకున్నారని పేర్కొన్నారు.
పోలీసు అమరవీరుల అత్యున్నత త్యాగాలను స్మరించుకోవడంతో పాటు విద్యార్థులు, యువతలో సామాజిక బాధ్యత, వ్యక్తిగత భద్రతపై స్పష్టమైన అవగాహన పెంపొందించడమే ఈ కార్యక్రమ ముఖ్య ఉద్దేశమని ఎస్‌హెచ్‌ఓ వివరించారు. విద్యార్థులు మాదకద్రవ్యాల భారిన పడకుండా దూరంగా ఉండాలని, సైబర్ నేరాల పట్ల నిరంతరం అప్రమత్తంగా ఉంటూ సోషల్ మీడియాను బాధ్యతాయుతంగా వినియోగించుకోవాలని మహేశ్వరం పోలీసులు పిలుపునిచ్చారు. ఈ భారీ కార్యక్రమాన్ని విజయవంతం చేసేందుకు సహకరించిన వివిధ విద్యాసంస్థల యాజమాన్యాలకు, ఉపాధ్యాయులకు, విద్యార్థులకు అధికారులు కృతజ్ఞతలు తెలిపారు. ఈ కార్యక్రమంలో ఎస్సైలు మారయ్య, ప్రసాద్, ధనుంజయ్, ఏఎస్సైలు శ్రీనివాస్ రెడ్డి, రాంలాల్, పోలీసు సిబ్బంది, ఉపాధ్యాయులు తదితరులు పాల్గొన్నారు.