పెద్ద గోల్కొండ ఓఆర్ఆర్ వద్ద ఘోర ప్రమాదం.. సిమెంట్ పైపుల ఆటోను కారు ఢీకొని మహిళ మృతి

శంషాబాద్: రంగారెడ్డి జిల్లా శంషాబాద్ పరిధిలోని పెద్ద గోల్కొండ ఔటర్ రింగ్ రోడ్డు (ORR) వద్ద ఘోర రోడ్డు ప్రమాదం చోటుచేసుకుంది. ఈ ప్రమాదంలో ఓ మహిళ అక్కడికక్కడే దుర్మరణం చెందగా, మరో వ్యక్తి తీవ్రంగా గాయపడ్డాడు.

స్థానికులు తెలిపిన వివరాల ప్రకారం.. సిమెంట్ పైపుల లోడుతో వెళ్తున్న అశోక్ లేలాండ్ ఆటోను వెనుక నుంచి వచ్చిన ఒక కారు తీవ్ర అతివేగంతో బలంగా ఢీకొట్టింది. ఈ ప్రమాద ధాటికి కారు తీవ్రంగా ధ్వంసమైంది. కారులో ప్రయాణిస్తున్న మహిళ తీవ్ర రక్తస్రావమై ఘటనా స్థలంలోనే ప్రాణాలు కోల్పోగా, కారు నడుపుతున్న వ్యక్తి తీవ్ర గాయాలపాలయ్యాడు.

రోడ్డు ప్రమాదం గురించి సమాచారం అందుకున్న వెంటనే శంషాబాద్ ఆర్జీఐఏ (RGIA) పోలీసులు ఘటనా స్థలానికి చేరుకుని సహాయక చర్యలు చేపట్టారు. గాయపడిన వ్యక్తిని చికిత్స నిమిత్తం ఆసుపత్రికి తరలించగా, మృతదేహాన్ని పోస్టుమార్టం నిమిత్తం ఉస్మానియా జనరల్ ఆస్పత్రికి తరలించారు. కారు అతివేగమే ఈ ప్రమాదానికి కారణమా లేక మరేదైనా కారణం ఉందా అనే కోణంలో పోలీసులు విచారణ జరుపుతున్నారు. మృతురాలి వివరాలు మరియు ప్రమాదానికి సంబంధించిన పూర్తి సమాచారం తెలియాల్సి ఉంది. ఈ ఘటనపై కేసు నమోదు చేసుకున్న ఆర్జీఐఏ పోలీసులు దర్యాప్తు చేస్తున్నారు.