డెస్క్: భారత క్రికెట్ జట్టుకు ఎదురుదెబ్బ తగిలింది. స్టార్ ఆల్‌రౌండర్ హార్దిక్ పాండ్యా మళ్లీ మైదానంలోకి రావడానికి చాలా సమయం పట్టే అవకాశం ఉంది. ప్రస్తుత గాయం నుంచి కోలుకోవడానికి పాండ్యాకు సుదీర్ఘ విశ్రాంతి అవసరమని, అతడు నేరుగా వచ్చే ఏడాది ఐపీఎల్‌లోనే ఆడే అవకాశం ఉందని క్రికెట్ వర్గాల ద్వారా వార్తలు వస్తున్నాయి.
హార్దిక్ పాండ్యా ఈ ఏడాది ఐపీఎల్ చివరి దశలో వెన్నునొప్పి సమస్యతో తీవ్రంగా ఇబ్బంది పడ్డాడు. అనంతరం భారత జట్టు తరఫున ఆడేందుకు సిద్ధమవుతున్న సమయంలో తొడ కండరానికి గాయమైంది. ఆ గాయం నుంచి కోలుకునే ప్రక్రియలో మరోసారి కాలి కింది భాగంలో నొప్పి మొదలైంది. ఈ వరుస గాయాల కారణంగా అతడు పలు కీలక అంతర్జాతీయ సిరీస్‌లకు దూరమయ్యాడు. ప్రస్తుతం వైద్యుల సూచన మేరకు పాండ్యా విశ్రాంతి తీసుకుంటున్నాడు. గాయంపై అదనపు ఒత్తిడి పడకుండా తగు జాగ్రత్తలు తీసుకుంటున్నాడు.
తాజా సమాచారం ప్రకారం, వచ్చే ఏడాది ఐపీఎల్ వరకు పాండ్యా క్రికెట్‌కు పూర్తిగా దూరంగా ఉండే ఛాన్స్ ఉంది. అతడు కోలుకునే వేగం, వైద్య నిపుణుల పరీక్షల ఫలితాలు, ఫిట్‌నెస్‌ ఆధారంగానే అతడి పునరాగమనంపై తుది నిర్ణయం తీసుకోనున్నారు. రాబోయే 2027 వన్డే ప్రపంచకప్‌నకు భారత్‌ సన్నద్ధమవుతున్న తరుణంలో హార్దిక్ అందుబాటులో లేకపోవడం జట్టు నిర్వహణకు ఆందోళన కలిగించే అంశం. బ్యాటింగ్‌, బౌలింగ్‌ రెండింటిలోనూ అద్భుతమైన సేవలందించగల పాండ్యా స్థానంలో ప్రత్యామ్నాయాన్ని కనుగొనడం ప్రస్తుతం టీమిండియా మేనేజ్‌మెంట్‌కు పెద్ద సవాలుగా మారింది.